சென்னை: ஜேஇஇ இல்லாமல் வானூர்தி மற்றும் விண்வெளி தொழில்நுட்பத்தில் ஆன்லைன் பி.எஸ் படிப்ப்பை சென்னை ஐஐடி அறிமுகபடுத்தியுள்ளது. இதுதொடர்பாக ஐஐடி வெளியிட்டுள்ள செய்திக்குறிப்பு: சென்னை ஐஐடியின் வானூர்தியியல் மற்றும் விண்வெளித் தொழில்நுட்பத்தில் புதிய இளங்கலைப் பட்டத்தை அறிமுகப்படுத்துகிறது. இது ஆன்லைன் முறையில் வழங்கப்படும் திறன் அடிப்படையிலான இளங்கலை பட்டப்படிப்பாகும். வானூர்தியியல், விண்வெளி அமைப்புகள் மற்றும் அதனுடன் தொடர்புடைய துறைகளில் தொழில்துறை தொடர்பான பகுப்பாய்வு மற்றும் வடிவமைப்புத் திறனை கற்றுக்கொள்வோரைத் தயார்படுத்த வடிவமைக்கப்பட்டுள்ளது.

வலுவான தேசியத் தேவைகளை பூர்த்தி செய்யும் வகையில் தொடங்கப்பட்டுள்ள இத்திட்டம், ஆளில்லா வான்வழி வாகனங்கள், சிவில் விமானப் போக்குவரத்து, விண்வெளித் தொழில்நுட்பம் போன்ற முக்கிய துறைகளில் உள்ள திறன் இடைவெளிகளை நிரப்புகிறது. ஐஐடி-ன் அவுட்ரீச் மற்றும் டிஜிட்டல் கல்வி மையம் மூலம் வேலைவாய்ப்பும், பயிற்சியும் வழங்கப்படும். இப்படிப்பை கற்போருக்கு வேலைவாய்ப்பு வாய்ப்புகளும் அதிகமாகும். 12ம் வகுப்பு அல்லது அதற்கு இணையான படிப்பில் தேர்ச்சி பெற்றவர்கள், டிப்ளமோ முடித்தவர்களுக்கு மாணவர் சேர்க்கையில் எந்தவித வரம்பும் கிடையாது. ஐஐடி-ஜேஇஇ தகுதிக்கான தேவையும் இல்லை. மையங்களில் தேர்வு எழுதுவது, ஆன்லைன் மதிப்பீடு ஆகியவை ஞாயிற்றுக்கிழமைகளில் மட்டுமே நடத்தப்படுகின்றன. இந்த பாடத்திட்டத்தை நேற்று சென்னை ஐஐடி இயக்குநர் காமகோடி தொடங்கி வைத்தார். இவ்வாறு அதில் கூறப்பட்டுள்ளது.