சென்னை: தமிழக வெற்றிக் கழகம் எனும் ‘டாப் இன்ஜின்’ பாஜவுக்கு எதிராக இயங்காதா என சமூக வலைதளங்களில் நெட்டிசன்கள் விமர்சித்து வருகிறார்கள். தமிழக வெற்றிக் கழகத்தின் மூன்றாம் ஆண்டு தொடக்கவிழா பனையூரில் உள்ள அக்கட்சியின் தலைமை அலுவலகத்தில் நேற்று நடந்தது. இதில், அக்கட்சியின் தலைவர் விஜய் பேசினார். எப்போதும் போல திமுக மீதான வன்ம அரசியலில் மட்டுமே தனது கவனத்தை குவித்தார். ‘ஒரு பக்கம் மாபெரும் மக்கள் சக்தியாக நாம் நிற்கிறோம். இன்னொரு பக்கம் திமுக தலைமையில் சில கூட்டணிக் கட்சிகள் இருக்கின்றன.

மற்றொரு பக்கம் பாஜ தலைமையில் மற்றும் பலர்’ என்று கூறிய விஜய், வேறு எந்த இடத்திலும் பாஜ என்ற பெயரைக்கூடத் தவறியும் உச்சரிக்கவில்லை ஒன்றிய பட்ஜெட்டில் தமிழகத்திற்கு எந்த அறிவிப்பும் இல்லை என்பதைப் பற்றி மூச்சுகூட விடவில்லை. ‘மக்களால் அங்கீகரிக்கப்பட்ட ‘டாப் இன்ஜின்’ நமது த.வெ.க மட்டும்தான்’ என்று விஜய் பேசினார். ஆனால் இந்த ‘டாப் இன்ஜின்’ பாஜவுக்கு எதிராக இயங்காதா என சமூக வலைதளங்களில் கேள்விகளை முன்வைத்து வருகிறார்கள். மேலும், விஜய் தனது கடைசி திரைப்படம் எனச் சொல்லும் ஜனநாயகன் படத்தை வெளியிட தடையாக இருக்கும் சென்சார் குறித்தோ, அதற்குப் பின்னால் உள்ள பாஜவின் கரங்கள் குறித்தோ இந்த முறையும் மிகக்கவனமாக வாய் திறக்காமல், எந்த விமர்சனமும் வைக்காமல் இருந்தது சமூக வலைதளங்களில் விமர்சனத்திற்கு உள்ளாகியுள்ளது.