* கேரளா 24.08 லட்சம், மபி 42.74 லட்சம், சட்டீஸ்கர் 27.34 லட்சம், அந்தமான் 64 ஆயிரம்
புதுடெல்லி: மத்தியப்பிரதேசம், சட்டீஸ்கர், கேரளா, அந்தமான் நிக்கோபார் ஆகிய மாநிலங்களில் சுமார் 95 லட்சம் வாக்காளர்களின் பெயர்கள் வரைவு வாக்காளர் பட்டியலில் இடம்பெறவில்லை. அந்தமான் நிக்கோபார் தீவுகளில், 3.10 லட்சம் வாக்காளர்களில் 64,000 வாக்காளர்களின் பெயர்கள் வரைவுப் பட்டியலில் இடம்பெறவில்லை. இதேபோல் கேரளாவில், 2.78 கோடிக்கும் மேற்பட்ட வாக்காளர்களில் 24.08 லட்சம் பேரின் பெயர்கள் வரைவுப் பட்டியலில் இருந்து நீக்கப்பட்டுள்ளன.
சட்டீஸ்கரில், 2.12 கோடி வாக்காளர்களில் 27.34 லட்சம் பேரின் பெயர்கள் நீக்கப்பட்டுள்ளன. மத்தியப் பிரதேசத்தைப் பொறுத்தவரை, 5.74 கோடி வாக்காளர்களில் 42.74 லட்சம் பேரின் பெயர்கள் வரைவுப் பட்டியலில் இருந்து நீக்கப்பட்டுள்ளன. இறுதி வாக்காளர் பட்டியல் அடுத்த ஆண்டு பிப்ரவரி 14-ஆம் தேதி வெளியிடப்படும். வரைவுப் பட்டியலில் இருந்து நீக்கப்பட்டவர்கள் தங்கள் பெயரைச் சேர்ப்பதற்கு விண்ணப்பிக்கலாம், மேலும் வாக்காளர் பதிவு அதிகாரிகள் இது குறித்து இறுதி முடிவு எடுப்பார்கள் என்று தேர்தல் ஆணையம் தெரிவித்துள்ளது.
மபி: மத்தியபிரதேசத்தில் மொத்தமுள்ள 5,74,06,143 வாக்காளர்களில், 5,31,31,983 பேர் மட்டுமே சிறப்புத் தீவிரத் திருத்தப் பணியின் போது தங்களின் கணக்கெடுப்புப் படிவங்களைச் சமர்ப்பித்துள்ளனர். இந்த பணிக்குப் பிறகு, 42,74,160 வாக்காளர்கள் தங்களின் கணக்கெடுப்புப் படிவங்களைச் சமர்ப்பிக்கவில்லை. இந்த 42.74 லட்சம் பெயர்களில், 8.46 லட்சம் பேர், அதாவது 1.47 சதவீதம் பேர் இறந்தவர்கள் என்று கண்டறியப்பட்டுள்ளது. 31.51 லட்சம் பேர், அதாவது 5.49 சதவீதம் பேர் (அவர்கள் கொடுத்த வீட்டு முகவரியில்) இல்லாதவர்கள் அல்லது வேறு இடங்களுக்குக் குடிபெயர்ந்தவர்கள்.
அதே சமயம் 2.77 லட்சம் பேர் ஒன்றுக்கும் மேற்பட்ட இடங்களில் வாக்காளர்களாகப் பதிவு செய்யப்பட்டிருப்பது கண்டறியப்பட்டுள்ளது.ஒன்றுக்கும் மேற்பட்ட இடங்களில் பதிவு செய்யப்பட்ட வாக்காளர்களின் பெயர்கள் ஒரே ஒரு வாக்குச்சாவடியில் மட்டுமே வாக்காளர் பட்டியலில் இடம்பெறும். தகுதியுள்ள வாக்காளர்கள் டிசம்பர் 23 முதல் ஜனவரி 22 வரை கோரிக்கைகளையும் ஆட்சேபனைகளையும் தெரிவிக்கலாம் என்றும், அதன் பிறகு இறுதிப் பட்டியலை தேர்தல் ஆணையம் வெளியிடும் என்று மத்தியப் பிரதேச தலைமைத் தேர்தல் அதிகாரி சஞ்சீவ் குமார் ஜா தெரிவித்தார்.
கேரளா: கேரளாவில் சிறப்புத் தீவிரத் திருத்தப் பணியின் ஒரு பகுதியாக நேற்று வெளியிடப்பட்ட வரைவு வாக்காளர் பட்டியலில் 24 லட்சத்திற்கும் மேற்பட்ட வாக்காளர்கள் பெயர்கள் நீக்கப்பட்டுள்ளன. இதுதொடர்பாக கேரள தலைமை தேர்தல் அதிகாரி ரத்தன் யு கேல்கர் கூறியதாவது: வாக்காளர் பட்டியல் சிறப்பு தீவிர திருத்தப்பணிகள் தொடங்கும் முன்பு கேரளா வாக்காளர் பட்டியலில் 2,78,50,855 வாக்காளர்கள் இருந்தனர்.
சிறப்புத் தீவிரத் திருத்தப் பணியின் கணக்கெடுப்பு நிலை முடிந்த பிறகு, வரைவுப் பட்டியலில் 2,54,42,352 வாக்காளர்கள் சேர்க்கப்பட்டுள்ளனர். அதே நேரத்தில், 24,08,503 வாக்காளர்களின் பெயர்கள் நீக்கப்பட்டுள்ளன. நீக்கப்பட்ட பெயர்களில், 6,49,885 பெயர்கள் இறந்தவர்களின் பெயர்கள் ஆகும். 6,45,548 வாக்காளர்களைக் கண்டறிய முடியவில்லை. மேலும் 8,16,221 வாக்காளர்கள் தங்களின் பதிவு செய்யப்பட்ட முகவரியிலிருந்து நிரந்தரமாக இடம் பெயர்ந்துள்ளது கண்டறியப்பட்டது.
இது தவிர, 1,36,029 இரட்டைப் பதிவு வாக்காளர்கள் மற்றும் பிற வகைகளின் கீழ் வரும் 1,60,830 வாக்காளர்கள் அடையாளம் காணப்பட்டனர். பட்டியலில் இருந்து நீக்கப்பட்ட பெயர்களின் சதவீதம் 8.65 சதவீதமாக உள்ளது. வரைவுப் பட்டியல் தொடர்பான ஆட்சேபனைகள் மற்றும் குறைகளை ஜனவரி 22 வரை சமர்ப்பிக்கலாம். இறுதி வாக்காளர் பட்டியல் பிப்ரவரி 21 அன்று வெளியிடப்படும். இவ்வாறு தெரிவித்தார்.
