ஊட்டி, நவ. 25: ஊட்டியில் இருந்து வேலிவியூ வழியாக கேத்தி செல்லும் சாலை சிரமைக்கப்பட்ட நிலையில், பொதுமக்கள் மற்றும் வாகன ஓட்டுநர்கள் நிம்மதியடைந்துள்ளனர். ஊட்டியில் இருந்து கேத்தி செல்வதற்கு வேலிவியூ பகுதியில் இருந்து ஒரு சாலை உள்ளது. இச்சாலை கேத்தி பேரூராட்சி மற்றும் ஊட்டி நகராட்சி கட்டுப்பாட்டின் கீழ் வருகிறது. ஊட்டியில் இருந்து எல்லநள்ளி வழியாக கேத்தி செல்வதற்கு சுமார் அரைமணி நேரம் ஆகும். அதே சமயம், 10 கி.மீ., தூரத்திற்கு மேல் பயணிக்க வேண்டும். வேலிவியூ வழியாக சென்றால் சுமார் 4 கி.மீ., சென்றால் போதும் கேத்தியை அடைந்துவிடலாம். அதேபோல், 15 நிமிடங்களில் ஊட்டியில் இருந்து கேத்தி சென்று விடலாம்.
இவ்வழித்தடத்தை பயன்படுத்துவதன் மூலம் எரிப்பொருள், நேரம் மற்றும் பணத்தை மிச்சப்படுத்த முடியும். எனவே, கேத்தி மற்றும் அதனை சுற்றியுள்ள பெரும்பாலான கிராம மக்கள் மற்றும் விவசாயிகள் இவ்வழித்தடத்தையே பிரதான வழித்தடமாக பயன்படுத்தி வருகின்றனர். இந்நிலையில், ஊட்டி நகராட்சிக்குட்பட்ட சாலையில் பெரிய அளவிலான பள்ளங்கள் ஏற்பட்டிருந்தது. இதனை சீரமைக்க வேண்டும் என பொதுமக்கள் மற்றும் விவசாயிகள் வலியுறுத்தி வந்தனர். இதனை தொடர்ந்து, இச்சாலையை நகராட்சி நிர்வாகம் சீரமைத்தது. ஆனால், கேத்தி பேரூராட்சிக்குட்பட்ட சாலை பழுதடைந்து காணப்பட்டது.
மேலும், புதர் செடிகள் வளர்ந்து இச்சாலை பயன்படுத்த முடியாத நிலை ஏற்பட்டது. இந்நிலையில், இச்சாலையை சீரமைக்க வேண்டும் என பொதுமக்கள் வலியுறுத்தி வந்தனர். இதனை தொடர்ந்து, கேத்தி பேரூராட்சிக்குட்பட்ட சாலை சீரமைக்கப்பட்டுள்ளது. சாலையோரத்தில் இருந்த புதர்களும் அகற்றப்பட்டுள்ளது. இதனால், பொதுமக்கள் மற்றும் வாகன ஓட்டுநர்கள் நிம்மதியடைந்துள்ளனர்.
